“İlkin dövrdə Azərbaycan-Ermənistan şərti sərhədində atəşkəsin pozulması qüsamüdətli və fasilələrlə olurdu. Son dövrlər isə atəşkəs sistemli şəkildə pozulur, demək olar ki, hər gün və fasiləsiz. Bu, yaxşı əlamət deyil”.
Bunu “Reytinq” qəzetinə açıqlamasında professor Qabil Hüseynli deyib.
Son dövrlər Ermənistan tərəfindən sistemli olaraq Azərbaycan Ordusunun mövqelərinə atəş açılmasının səbəblərindən danışan Q. Hüseynli hesab edir ki, bu insidentlər Ermənistanın müəyyən mərkəzləri tərəfindən törədilir. Onun sözlərinə görə, hətta iş o yerə çatıb ki, Ermənistan baş naziri Nikol Paşinyan mətbuat vasitəsilə atəşkəsin Ermənistan tərəfindən pozulduğunu etiraf edib və bunun qarşısının alınmasının vacibliyini bildirib.
Professorun fikrincə, N. Paşinyan Azərbaycanla sülh sazişi imzalamaq, problemi aradan qaldırmaq və tarixə düşmək niyyətində olsa da, daxildəki qüvvələr ona belə bir imkan vermək istəmirlər.
Q. Hüseynli qeyd edib ki, Sarksiyan və Köçəryan hakimiyyəti zamanında Ermənistan Silahlı Qüvvələrinə Qarabağdan olan çoxlu sayda erməni yerləşdirilib: “Həmin ermənilərin çoxu mayor rütbəsindən general rütbəsinə qədər irəliləyiblər. İndi onlar sülh sazişinin imzalanmasına qarşı çıxır, faktiki olaraq, prosesi pozmağa cəhd edirlər. Yəni atəşin pozulması əmri Ermənistan daxilindən gəlir. Bununla Paşinyana deyirlər ki, sən sülh sazişi imzalaya bilməzsən”.
Professor əlavə edib ki, indiki prosesdə atəşkəsin ABŞ, Fransa və ya Rusiyanın istəyi ilə edildiyini demək bir qədər çətin olsa da, bu da istisna deyil: “Mən diqqəti daha çox Ermənistanda olan Avropa Birliyinin mülki missiyasına çəkmək istərdim. Onların əsas vəzifəsi Ermənistan-Azərbaycan arasında hazırda mövcud olan şərti sərhəddə atəşkəsin təmin edilməsi, sakitliyə riayət olunmasını təmin etməkdir. Üstəlik, onların əllərində xüsusi dürbinlər var və vəziyyəti görürlər. Bəs niyə səslərini çıxarmırlar? Hesab edirəm ki, onlar bu suala cavab verməlidirlər. Mənim qənaətimcə, onlar bu vəziyyəti müşahidə edib, qeydiyyata alsalar da, ictimaiyyətə açıqlamaq istəmirlər”.
Prosesin Ermənistan daxilindən qaynaqlandığına əmin olan Q. Hüseynli sonda deyib ki, qarşı tərəf Azərbaycan Ordusunun gücünə və imkanlarına bələddir: “Sözsüz ki, Azərbaycan sonsuza qədər belə hallara səbr etməyəcək. Odur ki, Ermənistan hakimiyyəti diqqətli olmalıdır”.
