Prezidentliyə Respublikaçı namizədlər arasında daşınmaz əmlak maqnatı Donald Tramp rəy sorğularında ən yüksək yeri tutur. Bunun səbəbi isə onun qanunsuz mühacirlərlə bağlı kobud ifadələridir. Bəs Donald Trampı ABŞ prezident seçkilərində bir faktora çevirən nədir və onun Respublikaçıların vahid namizədliyi uğrunda mübarizəni qazanmaq ehitmalı varmı?
D.Tramp rəy sorğularında yüksək yerləri tutur və öz çıxışlarına böyük kütlələrin diqqətini yönəldə bilir. O, Arizonadakı çıxışı zamanı deyib: "Mənim Meksikaya bir ölkə kimi böyük hörmətim var. Lakin problem ondadır ki, onların liderləri daha ağıllı, daha sərt və daha hiyləgərdirlər və onlar bizi həm sərhəddə, həm də ticarətdə məhv edirlər."
Onun qanunsuz mühacirlər barədə söylədikləri mühacirlərin haqlarının müdafiəçilərinin qəzəbinə və etirazına səbəb olub.
Bundan əlavə, Tramp hətta bəzi demokrat namizədlərin də etirazına tuş gəlib. Onların sırasına sabiq Merilənd qubernatoru Martin O-Malli də daxildir. O deyir ki, əgər Donald Tramp özünə mühacirləri təhqir edən siyasi platforma seçirsə, o zaman Tramp 1840-cı illərə geri dönüb, anti-immiqrasiya partiyasından namizədliyini irəli sürməlidir.
Lakin Respublikaçı təhlilçi Skot Faulknerin sözlərinə görə, Trampın sərt tərzi mühafizəkarların xoşuna gəlir.
Buna baxmayaraq, bəzi respublikaçı liderlər Donald Trampın sərt ritorikasının gələn il keçiriləcək seçkilərdə partiyaya ziyan vuracağını düşünürlər.
Ümumiyyətlə, Donald Trampın qalib olması qeyri-mümkün görünür. Bildirilir ki, tanınmasına və qanunsuz mühacirlər haqqında ziddiyətli ifadələrinə baxmayaraq, Trampın partiya tərəfindən namizəd kimi göstərilməsi mümkün deyil.
Bununla belə Donald Tramp digər Respublikaçı namizədləri kölgədə qoyub ki, onların sırasına Uiskonsin ştatının qubernatoru Skot Ualker də daxildir.
