Rusiya Dövlət Dumasının Turizm komitəsinin sədrinin birinci müavini Nikolay Valuyevin Azərbaycana girişinə qadağa qoyulması barədə xəbər vermişdik. Xatırladaq ki, buna səbəb Dövlət Dumasının deputatının Azərbaycan əleyhinə fikirləri olub.
XİN-in rəsmi Ayxan Hacızadə bildirib ki, Nikolay Valuyevin Azərbaycan dövləti və xalqının əleyhinə işlətdiyi təhqiramiz ifadələr, təhdid xarakterli fikirlər tamamilə qəbuledilməzdir. Qeyd edilən deputatın Azərbaycan əleyhinə fikirləri ilə bağlı onun adı Azərbaycan Respublikasına girişi qadağan edilmiş şəxslərin siyahısına daxil edilib və ölkəyə girişinə qadağa qoyulub.
A.Hacızadə diqqətə çatdırıb ki, Azərbaycana qarşı fəaliyyət göstərən bütün bu deputatlar məhz Rusiyanın hakim “Vahid Rusiya” (Yedinaya Rossiya) partiyasının üzvləridir: “Ölkəmizin suverenliyinə, ərazi bütövlüyünə, Azərbaycan xalqına qarşı fəaliyyət göstərən bu kimi şəxslərə qarşı ölkəmizin qanunvericiliyi çərçivəsində bundan sonra da müvafiq addımlar atılacaq”.
Məlumdur ki, “Vahid Rusiya”ya eks-prezident Dmitri Medvedyev rəhbərlik edir. Onun rəhbərliyi dövründə bu partiyaya ultra-radikal mövqeləri ilə seçilən şəxslərin soxulması da faktdır. Hakim partiyadan bu cür mövqe Azərbaycana münasibətdə ilk dəfə deyil. Dumanın hakim partiyadan olan üzvü Konstantin Zatulin dəfələrlə bu cür fikirlər səsləndirib, açıq ermənipərəst mövqe sərgiləyib. Dövlət Dumasının “Vahid Rusiya”dan olan daha bir üzvü, milliyyətçi mövqeyi ilə seçilən Vitaliy Milonov da bir sıra erməni və Rusiya mediasına müsahibəsi zamanı xalqımıza qarşı təhqiramiz ifadələr səsləndirmişdi. Həmin vaxt hətta YAP Medvedyevə etiraz məktubu da göndərmişdi. Milli Məclisin sədri Sahibə Qafarova Dövlət Dumasının sədri Vyaçeslav Volodinə zamanında etiraz məktubu da ünvanlamışdı. Azərbaycanın hakimiyyət partiyası ilə Rusiyanın hakim partiyası arasında dostluq, əməkdaşlıq münasibətləri haqqında müqavilə mövcuddur. Bu barədə hələ 2007-ci ilin sentyabrında Bakıda YAP ilə “Vahid Rusiya” arasında əməkdaşlığa dair sayca 7-ci müqavilə imzalanıb. YAP-ın bu baxımdan “Vahid Rusiya”ya etiraz etmək haqqı var. Lakin indiyədək olan müraciətlərə cavab verilməməsi əsas verir ki, YAP məktub ünvanlayacağı halda da reaksiya olmayacaq.
YAP-ın Mərkəzi Aparatı ilə Milli Məclisdə təmsil olunan deputat qrupu arasında əlaqələndirici, millət vəkili Hikmət Babaoğlu “Yeni Müsavat”a bildirdi ki, Milli Məclisdə parlamentlərarası işçi qrupları mövcuddur və onlar çox səmərəli fəaliyyət göstərirlər: "Rusiyada da Azərbaycanla parlamentlərarası işçi qrupu var. Hazırkı mərhələdə heç şübhəsiz ki, Rusiya ilə Azərbaycan arasında yaradılmağa cəhd göstərilən bu süni gərginliklə bağlı müəyyən parlamentarilərimiz öz fikirlərini səsləndidirlər, etiraz edirlər. Təəssüf ki, Rusiyada buna məhəl qoymayan deputatlar var. Azərbaycan parlamentariləri də buna çox qətiyyətli cavablar verirlər. Əgər belə davam edərsə, Milli Məclisdəki Rusiya ilə parlamentlərarası işçi qrupu da bəyanat yaya bilər. Ona görə düşünürəm ki, qarşılıqlı münasibətlərdə Azərbaycan tərəfinin mövqeyi daha da gərginlik yaratmaq deyil, sadəcə, Rusiya tərəfindən yaradılan problem dostcasına həll etməkdən ibarətdir. Hazırkı mərhələdə Rusiyanın ali siyasi dairələrinin cavabını gözləmək lazımdır. Əgər yenidən Azərbaycana qarşı amiranə tərz davam edəcəksə, yenidən Azərbaycana qarşı dezinformasiya müharibəsi davam edəcəksə əlbəttə Azərbaycan tərəfdən növbəti addımlar atıla bilər. Biz cəbbəxanamızın hamısını birdən-birə boşalda bilmərik. Məsələ ilə bağlı lazımi məqam çatanda İşçi qrupunun da, siyasi partiyaların da ayrılıqda və ya birlikdə mövqeyi ola bilər".
Yeni Azərbaycan Partiyasının deputatı Elman Nəsirov isə dedi ki, Rusiya-Azərbaycan arasında münasibətlərdə gərginliyin məsuliyyəti qarşı tərəfin üzərinə düşür: “Rusiya mediasında, telekanallarında gecə-gündüz dövlətimiz, xalqımız əleyhinə dezinformasiyalar yayılır. Bir çox hallarda Azərbaycana qarşı təhqirlərə yol verilir. Ən acınacaqlı odur ki, bu ritorikanı daha çox Dövlət Dumasının deputatları sərgiləyirlər. Daha dəhşətlisi odur ki, bunu hakim "Vahid Rusiya"nın deputatları söyləyirlər. Məsələn, Valuyev onların içərisində seçilənlərdəndir. Görünür, boksçu karyerasında Valuyevin başına o qədər zərbələr dəyib ki, zədə alıb və bir çox hallarda nə danışdığını bilmir. Azərbaycan xalqına qarşı təhqiramiz ifadələr bağışlanmazdır. Azərbaycan XİN haqlı olaraq Valuyevi arzuolunmaz şəxs siyahısına daxil edib. “Vahid Rusiya” Partiyasının digər deputatları da Azərbaycana və azərbaycanlılara qarşı bağışlanmaz mövqe nümayiş etdirirlər, təhdid dili ilə danışırlar. Əvvəllər də buna oxşar hadisələr olub. O zaman da Azərbaycan Milli Məclisinin deputatları, Yeni Azərbaycan Partiyasının nümayəndələri də parlament tribunasından haqsızlığa qarşı öz səsini ucaldıb, mediada mövqelərini ifadə eləyib. Bu gün də biz mövqeyimizi bu şəkildə ifadə edirik. Rusiya tərəfinin ikitərəfli münasibətlərə xələl gətirən davranışına qiymət veririk, bunların qəbuledilməz olduğunu söyləyirik. Milli Məclis adından Dövlət Dumasına məktubun göndərilməsi isə Milli Məclis rəhbərliyinin səlahiyyətində olan məsələdir. Etiraz məktubunu göndərmək qərarını Milli Məclisin rəhbərliyi verə bilər. Biz deputatlar öz tənqidi mövqeyimizi bildiririk, qarşı tərəfi ikitərəfli münasibətləri ciddi zərbə vuran davranışdan çəkinməyə dəvət edirik. Dumaya etiraz məktubunun göndərilməsi müzakirə predmeti ola bilər".
Azad Vətən Partiyasının sədri Akif Nağı bildirdi ki, Rusiyadan Azərbaycana qarşı çirkin kampaniyaya ilk növbədə hakimiyyətdə olan YAP cavab verməlidir: “Burada bir neçə məqam var. Biri ondan ibarətdir ki, ola bilsin, Yeni Azərbaycan Partiyası hesab edir dövlətin müvafiq qurumları, Milli Məclisin üzvləri səviyyəsində Rusiyanın məlum siyasətinə münasibət bildirilir, reaksiya verilir, onların əksəriyyəti YAP-ın üzvləridir, ona görə partiya olaraq mövqe ortaya qoymağa lüzum yoxdur. Ola bilsin, düşünürlər ki, verilən reaksiyalar elə həm də YAP-ın reaksiyası sayılır. Yeni Azərbaycan Partiyasının partiya olaraq məsələyə münasibət bildirməməsində ola bilər ki, bu arqument rol oynayır. Digər məqam odur ki, Azərbaycana qarşı Rusiyada aparılan kampaniyada əsasən Dumanın deputatları iştirak edir və onlar partiya adından çıxış etmirlər. Yəni hakim "Vahid Rusiya" partiya olaraq Azərbaycana qarşı açıqlama, bəyanat verməyib. Ola bilər ki, buna görə YAP da bunu nəzərə alaraq partiya olaraq etiraz bəyanatı, yaxud məktubu ünvanlamır. Amma istənilən halda, YAP bu məsələyə bildirməlidir. Eyni zamanda digər siyasi partiyalar da münasibət bildirməlidir. Azərbaycana qarşı qərəzli mövqelərə cavab olaraq ortaya mövqe qoyulmalıdır".
